أشهر 57 يقولها الأب والأم..........

السلام عليكم ورحمة الله وبركاته
بسم الله الرحمن الرحيم
باختصار ( أزاي تعرف أنك اتربيت في بيت مصري)
علي مدي سنوات الطفولة والمراهقة يقطع الابن منزل أسرته رايح جاي وهو يستمع للنصائح والتوجيهات نفسها والتوبيخ نفسه بأساليب وجمل ثابتة لا تتغير .. حتي أصبحنا بمرور الوقت نحفظها جيداً ونتوقعها ( واهالينا يقولوا وأحنا نكمل لهم ) واسترجاع هذه المقولات " التي لا تسمعها إلا في البيت المصري " يبعث في الوجدان قشعريرة مصحوبة بنوع من الكوميديا . ويعمق محبة أهالينا في القلوب . ويجعلنا نكتشف كم الهستيريا والقلق والمسئولية التي تكبدها الأهالي في سبيل أن تقف فخوراً برأي الناس فيك " شكله بن ناس .. ومتربي "
كفاية بقا عشان بدات أبقا رخم
نبدأ في الجمل :-




1-(الأب) مش عايز أسمع صوت . وفي هذه الجملة تدريباً مبكراً علي تقبل الديكتاتورية الذي سوف تواجها طول حياتك .

2-(الأب) ما تردش عليا . ودي نصيحة إذا ألتزمت بها سوف تكسب مديرك في العمل .

3-(الأم) تعد في أول صف أدام السبورة.

4-(الأم) لو مش فاهم حاجة .. ارفع أيدك وقول للاستاذ مش فاهم ما تتكسفش .. (فاكرين المدرسين زي اللي كانوا علي أيامهم) .

5-(الأب) اللي بيشيل قربة مخرومة بتخر عليه لوحده.

6-(الأب) ومالها الكتب بتاعة الوزارة ؟ !

7-(الأم) بص كويس وأنت بتعدي الشارع .

8-(الأم) متتأخرش بعد المدرسة وتقعد تصيع مع أصحابك .. (وهي نصيحة سوف تحقق لك قدراً من السعادة الزوجية فيما بعد إذا تعودت علي أن تكون رجلا من الشغل للبيت) .

9-(الأب) أفرد ضهرك .

10-(الأب) مافيش مذاكرة علي المزيكا .. أو.. بتذاكر أزاي والبتاع دا شغال جنبك .

11-(الأم) ماتمشيش حافي في السقعة دي .

12-(الأب) صليت العصر ؟!

13-(الأم) ربنا يهديك يابني .. وأحيانا أنك لا تهدي من أحببت .

14-(الأب) أطفي التلفزيون دا وقوم ذاكرلك حاجة تنفعك دا الامتحان قرب (حتي لو كنا في أول المدارس) .. أو .. أطفي التلفزيون وقوم خش أوضتك .

15-(الأم)أوعي تقول لحد هاتلي حاجة .

16-(الأب) أقفل صدرك .

17-(الأب) بلاش وقفت الشبابيك والبلاكونات.
18-(الأم) كل علي مهلك .. وامضغ كويس .. ومتكولش وأنت واقف .. وكا من قدامك متحفش .

19-(الأب) كفاية رغي في التليفون .

20-(الأم) ما تعدتش قدام المروحة وانت لسا مستحمي .

21-(الأب) المسلسل مش هينفعك ... قوم ذاكر .

23-(الأب) وأنت فاكر ان أحنا مستنين منك حاجة ؟!

24-(الأب) متعليش صوتك عليا .

25-(الأم) بلاش لعب في الشارع .

26-(الأب) يابني ألي ذاكر ذاكر خلاص .. قوم نام .

27-(الأب) بلاش لعب بالمقص .... بيجيب الفقر .

28-(الأم) يابني كلم خالتك العيانة أسأل عليها .

29-(الأم) أوعي حد غريب يديك حاجة من برا تكولها أو تشربها .

30-(الأب) النوم لحد الظهر يجيب الفقر ..

31-(الأم) أوعي تكدب عليا تاني مرة .

32-(الأم) لازم تاكل سلطة ..

33-(الأم) لو شفت خناقة ملكش دعوة بيها .

34-(الأم) عيب.. لازم تحترم ألي أكبر منك .

35-(الأم) كلمنا لما توصل .

36-(الأب) ملكش دعوة بالسياسة .

37-(الأم) بلاش أكل برا ..

38-(الأب) لو فلحت أبقي قابلنى...(المشكله انه مقلش هقابله فين؟).

39-(الأب) متلبسش القميص على اللحم زي العيال الصايعة .

40-(الأب) يا بني أنت مسطول ولا أيه .

41-(الأب) أنت فاكرنا نايمين علي ودانا ؟!

42-(الأب) وطي الزفت دا شوية .

43-(الأب) قوم أقرأ لك كلمتين ينفعوك .

44-(الأب) أيه اللا مبالاه والاستهتار اللي أنت عايش فيهم دول .

45-(الأب) أنت فاكر احنا لاقيين الفلوس دي في الشارع .

46-(الأب) والله منتا فالح .. وأدي دقني أهه .

47-(الأم) ما تتكلمش بصوت عالي في الحمام .

48-(الأم) ما تنامش ألا أما تغسل سنانك ورجلك وتشرب اللبن .

49-(الأم) ما تلزقش وشك في التلفزيون كده .. نظرك هيضعف .

50-(الأب) ضرب أمثلة تشجع علي الكفاح وأشهرها " أحد الأقارب اللي ذاكر علي لمبة الجاز أو عي نور العمود في الشارع وخد الدكتوراه وسافر أمريكا ) .

51-(الأب) سلم علي عمك كويس يا ولد .

52-(الأم) يا بني محدش بينفع حد .

53-(الأب) ماتطلعش أيديك من شباك العربية .

54-(الأب) قصة الغريق الكاذب ألي كل مرة يقول ألحقوني لغاية مغرق بجد .

55-(الأب) ربنا يرزقك بعيل يوريك اللي أنت ورتهولنا .

56-(الأم) حول القناة دي بلاش مسخرة وقلة أدب.

57-(الأب) طلع أيدك من جيبك وأنت بتكلمنا .


بس باأمانة انا عاوزه أعرف أنت أتألك كام جملة من دول ماشي